قطر پر حملہ خطے کی سلامتی اور استحکام کیلئے خطرہ ہے، او آئی سی

جدہ: اسلامی تعاون تنظیم (او آئی سی ) نے دوحا پر اسرائیلی حملے کی شدید مذمت کرتے ہوئے کہا ہے کہ یہ حملہ کشیدگی میں خطرناک اضافہ ہے جو خطے کی سلامتی اور استحکام کے لیے خطرہ ہے۔
او آئی سی نے ایک بیان میں کہا کہ اسرائیلی حملہ بین الاقوامی قوانین، اقوام متحدہ کے چارٹر اور بین الاقوامی اصولوں کی کھلی خلاف ورزی ہے۔ او آئی سی نے قطر کے ساتھ یکجہتی کا اظہار کرتے ہوئے اس کی سلامتی، علاقائی سالمیت، استحکام اور اس کے شہریوں اور رہائشیوں کے تحفظ کے لیے اپنی حمایت کا اعادہ کیا۔ او آئی سی نے عالمی برادری بالخصوص اقوام متحدہ کی سلامتی کونسل سے مطالبہ کیا کہ وہ اسرائیل کو خطے میں جاری جارحیت کو روکنے اور بین الاقوامی قانون اور بین الاقوامی جواز کی قراردادوں پر عمل کرنے پر مجبور کرنے کے لیے اپنی ذمہ داریاں ادا کرے۔ سلامتی کونسل اسرائیل کو بین الاقوامی قوانین کا پابند بنائے۔