مغربی کنارہ تقسیم کرنے والے منصوبے کی منظوری، کوئی فلسطینی ریاست نہیں ہوگی، نیتن یاہو

تل ابیب: صیہونی وزیراعظم نیتن یاہو نے مغربی کنارہ تقسیم کرنے والے ای ون منصوبے سمیت بستیوں کی توسیع کی منظوری دیدی۔ اسرائیلی رہنما نے ای ون منصوبے کو آگے بڑھانے کے معاہدے پر دستخط کیے، جو مغربی کنارے کو دو حصوں میں تقسیم کرے گا اور شمال کو جنوب سے الگ کر دے گا۔
نیتن یاہو نے یروشلم کے بالکل مشرق میں واقع اسرائیلی بستی مالے ادوم میں تقریب سے خطاب میں کہا کہ ہم اپنا وعدہ پورا کرنے جا رہے ہیں کہ کوئی فلسطینی ریاست نہیں ہوگی۔ نیتن یاہو نے بتایا کہ یہ خطہ ہمارا ہے اور ہم اس کے مالک ہیں۔ اسرائیلی وزیراعظم نے کہا کہ ہم اپنے ورثے، اپنے وطن اور اپنی سیکیورٹی کا تحفظ کریں گے۔
نیتن یاہو اور اسرائیلی حکومت کا اس مقام پر ہزاروں کی تعداد میں گھر تعمیر کرنے کا منصوبہ ہے جہاں فلسطینی اپنی ریاست قائم کرنا چاہتے ہیں۔