امریکا: ایوان نمائندگان ڈیموکریٹس کے ہاتھ سے نکل گیا، جوبائیڈن مشکل میں

واشنگٹن : امریکا میں ایوان نمائندگان پر ری پبلکنز کا کنٹرول ہوگیا۔صدر جوبائیڈن کیلئے قانون سازی مشکل ہوجائے گی۔ امریکا میں ایوان نمائندگان اور سینیٹ پر ڈیموکریٹس کے دوسالہ کنٹرول کے بعد اب طاقت کا توازن تبدیل ہوگیا ہے۔ ریاست نیواڈا میں کلیدی فتح کے بعد ڈیموکریٹس نے سینیٹ پر تو کنٹرول برقرار رکھا لیکن وہ ایوان نمائندگان میں اکثریت کھوبیٹھے۔ ریپبلکنز نے مڈٹرم الیکشنز میں 218 نشستوں کے ساتھ ایوان نمائندگان میں سادہ اکثریت حاصل کرلی۔ جبکہ ڈیموکریٹس 9 نشستوں کی محرومی سے 435 رکنی ایوان میں 210 نشستیں لے پائے۔ ڈیموکریٹس کو الیکشن میں سرخ لہر کا خدشہ تھا لیکن ٹرمپ کے حمایت یافتہ امیدواروں کی ناکامی سے ری پبلکنز کی کارکردگی متاثر ہوئی اور وہ صرف ایوان میں معمولی اکثریت ہی حاص کرسکے۔ ایوان پر ری پبلکنز کے کنٹرول کی وجہ سے جوبائیڈن، ان کے خاندان اور انتظامیہ کے خلاف تحقیقات کا دروازہ کھل جائے گا۔ کیونکہ ایوان کی اہم کمیٹیوں پر ری ریپبلکنز کا کنٹرول ہوگا۔ بعض سخت گیر ارکان جوبائیڈن کے مواخذہ کی باتیں بھی کررہے ہیں لیکن سینیٹ میں اکثریت نہ ہونے سے ایسا کرنا ممکن نہیں ہوگا۔