Ilyas 
مجالس میں فاصلے کا خیال رکھا جائے گا، ماسک پہننا لازمی ہوگا، مجالس کو مقررہ وقت پر ہی شروع اور ختم کیا جائے گا، عمر رسیدہ افراد کو شرکت سے روکا جائے گا
تبرک پارسل میں ہوگا، علم، تعزیہ اور شبیہ کو چھونے سے احتراز کیا جائے گا،شرکا کی تعداد مناسب رکھی جائے گی،صدر مملکت کی زیر صدارت اجلاس میں فیصلے
اسلام آباد (نیوز ڈیسک ) حکومت اور شیعہ تنظیموں کے درمیان محرم الحرام کیلئے 20نکاتی ایس او پیز پر اتفاق ہوگیا، صدر ڈاکٹر عارف علوی اور ممتاز شیعہ علما ءکے درمیان اجلاس ایوان صدر اسلام آباد میں ہوا۔ جس میں وزیر داخلہ بریگیڈیئر (ر) اعجاز احمد شاہ، وزیر مذہبی امور پیر نورالحق قادری، گورنر پنجاب چوہدری محمد سرور، علامہ عارف واحدی، علامہ راجہ ناصر عباس جعفری، ڈاکٹر غضنفر مہدی، علامہ قمر حیدر زیدی، راجہ بشارت امامی اور علامہ سجاد حسین نقوی نے شرکت کی، جبکہ علامہ شہنشاہ نقوی، علامہ سیّد علی کرار نقوی اور علامہ فرقان حیدر عابدی سمیت مختلف علمائے کرام ویڈیو لنک کے ذریعے شریک ہوئے،اجلاس میں علمائے کرام نے ایس او پیز پر اتفاق کیاجس کے تحت مجالس میں فاصلے کا خیال رکھا جائے گا، لوگوں کے بیٹھنے کے لئے نشان لگائے جائیں گے،ماسک پہننا لازمی ہوگا، قالین کے استعمال سے اجتناب کیا جائے گا، مجالس کو مقررہ وقت پر ہی شروع اور ختم کیا جائے گا عمر رسیدہ افراد کو مجالس میں شرکت سے روکا جائے گا، تبرک اور نیاز کے دستر خوان کی بجائے پارسل کا اہتمام کیا جائے گا، علم، تعزیہ اور شبیہ کو چھونے سے احتراز کیا جائے گا، جلوس میں بھی ہینڈ سینیٹائزر کااستعمال اور ماسک لگا نا ضروری ہوگا، پانی پینے پلانے کے دوران مشترکہ برتن کے استعمال سے گریز کیا جائے گا ، شرکا کی تعداد مناسب رکھی جائے گی، وقت کو محدود کیا جائے گا ،صدر مملکت نے اجلاس سے خطاب کرتے ہوئے کہا کہ ماہ رمضان اور عیدالفطر کے موقع پر تمام مکاتب فکر سے تعلق رکھنے والے علمائے کرام نے کورونا وبا کی روک تھام کیلئے مکمل تعاون کیا اور انہیں امید ہے کہ اس بار بھی علمائے کرام مثالی تعاون کا مظاہرہ کریں گے
