Raza Musani 
کابل : افغانستان میں نئی حکومت کی آج ہونیوالی حلف برداری منسوخ کردی گئی، ترجمان طالبان سہیل شاہین کا کہنا ہے کہ طالبان کی عبوری کابینہ کی حلف برداری کی تقریب اب پلان کا حصہ نہیں، پہلے پروگرام میں تھا کہ ہم حلف برداری کی تقریب رکھیں گے، اس کے لیے ضروری تھا کہ دوسرے ممالک سے وفد مدعو کیے جائیں جب کہ پروٹوکول کے انتظامات اور عوام کے لیے سروسز کی ضرورت تھی، انہوں نے کہا کہ لیڈر شپ نے فیصلہ کیا ہے کہ فوری طور پر وزرا کا اعلان کیا جائے کیوں کہ عبوری کابینہ کا اعلان ہوچکا لہذا اب تقریب کینسل ہوچکی ہے، افغان کلچرل کمیشن نے نئی حکومت کی حلف برداری منسوخ کرنے کی تصدیق کردی اور واضح کیا کہ عبوری حکومت کام شروع کرچکی ہے، کمیشن نے حکومت میں کسی خاتون کو شامل نہ کرنے کا اعلان کرتے ہوئے کہا کہ سعودی عرب سمیت کئی ممالک میں کوئی خاتون وزیر نہیں، وزیر داخلہ سراج الدین حقانی نے ایک اجلاس سے خطاب میں کہا کہ تمام پڑوسی ممالک اور دنیا کے ساتھ اسلامی اصولوں اور قومی روایات کی روشنی میں مثبت تعلقات چاہتے ہیں۔ہم کسی کے معاملات میں مداخلت نہیں کرتے اور توقع رکھتے ہیں کہ وہ ہمارے معاملات میں مداخلت نہیں کرینگے۔
