بن سلمان اور بنیامین کی سعودی شہر نیوم میں ملاقات

اسرائیلی وزیراعظم خصوصی طیارہ میں سعودی شہر نیوم پہنچے،5گھنٹے قیام، امریکی وزیر خارجہ کی موجودگی میں بن سلمان سے ملاقات ،اسرائیلی اخبار نے بھانڈا پھوڑ دیا
 ملاقات میں صرف امریکی اور سعودی حکام موجود تھے،سعودی وزیرخارجہ کی تردید،ملاقات کے فوری بعد اسرائیل نے سعودیہ کو کورونا کی سرخ لسٹ سے نکال دیا
ریاض /مقبوضہ بیت المقدس (نیوز ڈیسک) اسرائیلی میڈیا نے صہیونی وزیر اعظم بن یامین نتن یاہوکے دورہ سعودی عرب اور ولی عہد محمد بن سلمان سے ملاقات کا بھانڈا پھوڑدیا،سعودی وزیر خارجہ جہ شہزادہ فیصل بن فرحان نے ملاقات کی تردید کی ہے جبکہ اسرائیلی وزیراعظم نے کسی تبصرہ سے انکار کردیالیکن اسرائیلی وزارت صحت نے سعودی عرب کو کورونا وائرس کی سبز لسٹ میں شامل کرنے کی خبر کی تصدیق کی ہے،عبرانی زبان کے اخبار نے نامعلوم اسرائیلی اہلکار کا حوالہ دیتے ہوئے کہا ہے کہ وزیر اعظم بنیامین نتن یاہو خفیہ ایجنسی موساد کے سربراہ یوسی کوہن کے ہمراہ اتوار 22 نومبر کو سعودی شہر نیوم گئے اور محمد بن سلمان سے ملاقات کی جہاں امریکی وزیر خارجہ مائیک پومپیو پہلے ہی ملاقات کیلئے موجود تھے،فلائٹ ٹریکنگ ڈیٹا کے مطابق نتن یاہو کے زیرِ استعمال طیارہ نیوم گیا جہاں وہ پانچ گھنٹے تک رکا،امریکی اخبار واشنگٹن پوسٹ کے مطابق اسرائیلی انٹیلی جنس کے ایک عہدیدار نے بتایا کہ اس ملاقات میں چند لوگ شامل رہے اور وزیر خارجہ اور وزیر دفاع کو بھی اس ملاقات کا علم نہیں ، اسرائیلی وزیر تعلیم یوائے گیلانٹ کا کہنا ہے کہ یہ ملاقات حقیقت میں ہوئی ہے لیکن اب عام ہوگئی، یہ بہت اہم ہے، سعودی وزیر خارجہ شہزادہ فیصل بن فرحان نے حسب توقع ملاقات کی خبروں کی تردید کردی اور کہا کہ ملاقات میں صرف امریکی اور سعودی حکام موجود تھے، اس ملاقات کے بعد اسرائیل کی وزارت صحت نے سعودی عرب کو کورونا وائرس کی سرخ لسٹ سے نکال کر سبز لسٹ میں شامل کرلیا، اس لسٹ میں ان ممالک کو شامل کیا گیا ہے جہاں سے واپس آنے والے افراد کو قرنطینہ میں نہیں رہنا پڑتا