کورونا کا پھیلاؤ، امریکا کا افغانستان سے فوری انخلا ء پر غور

افغانستان میں کورونا کے پھیلاؤ نے ڈونلڈ ٹرمپ کو فکر مند کردیا ہے اور وہ عالمگیر وبا کو افغانستان میں موجود اپنی فوج کے لیے خطرہ سمجھتے ہیں،امریکی میڈیا
کابل کے سیاسی تنازع کی وجہ سے صدر ٹرمپ کو مایوسی، ٹرمپ صبر کا دامن ہاتھ سے چھوڑ کر قبل از وقت افغانستان سے فوج واپس بلا سکتے ہیں،تجزیہ کار
واشنگٹن(نیوز ڈیسک) این بی سی نیوز کی رپورٹ کے مطابق افغانستان میں کورونا کے پھیلاؤ نے ڈونلڈ ٹرمپ کو فکر مند کردیا ہے اور وہ عالمگیر وبا کو افغانستان میں موجود اپنی فوج کے لیے خطرہ سمجھتے ہیں، رپورٹ کے مطابق مذکورہ وجوہات کی بنا پر ہی صدر ٹرمپ جلد از جلد افغانستان سے فوجی انخلا پرزور دے رہے ہیں، لیکن حکام نے صدر ٹرمپ کو بتایا ہے کہ اگر اسی بنیاد پر فوجی انخلا کرنا ہے تو اٹلی سے بھی فوج واپس بلانا پڑے گی جہاں وبا نے زیادہ شدت سے پنجے گاڑ رکھے ہیں، رپورٹ کے مطابق کابل کے سیاسی تنازع کی وجہ سے صدر ٹرمپ کو مایوسی ہوئی ہے، ان کی توقع تھی کہ طالبان سے معاہدے کے بعد وہ افغان جنگ کے خاتمے سے متعلق 2016 کے اپنے انتخابی وعدے کو پورا کردیں گے لیکن افغانستان میں صدر اشرف غنی اور عبداللہ عبداللہ کے درمیان انتخابی نتائج پر اختلافات، طالبان کی پرتشدد کارروائیوں میں اضافے اور افغانستان کے مختلف علاقوں میں کورونا وائرس کی وبا کی وجہ سے افغان امن عمل بظاہر تعطل کا شکار ہے، ماہرین کا کہنا ہے کہ افغانستان میں تشدد کے بڑھتے ہوئے واقعات اور اس صورتِ حال میں کورونا وائرس کا پھیلاؤ افغانستان سے امریکی فوج کے جلد انخلا کا پیش خیمہ ہو سکتا ہے، طالبان سے معاہدہ اس بات کا واضح اشارہ ہے کہ امریکا جتنی جلد ممکن ہو سکے افغانستان سے انخلا کرنا چاہتا ہے، لیکن افغانستان میں سیاسی عدم استحکام، پرتشدد واقعات میں اضافے سے صورتِ حال خاصی مخدوش ہے، اس مایوسی کے ماحول میں صدر ٹرمپ صبر کا دامن ہاتھ سے چھوڑ کر قبل از وقت افغانستان سے فوج واپس بلا سکتے ہیں۔