Raza Musani 
مقبوضہ بیت المقدس: مقبوضہ مغربی کنارے میں صیہونی آبادکاروں نے تین دیہات پر حملے کرکے گھروں اور گاڑیوں کو آگ لگادی۔ جبکہ ایک معمر فلسطینی خاتون کو تشدد کا نشانہ بنایا گیا۔
مقبوضہ مغربی کنارے میں اسرائیلی آبادکاروں نے نابلس کے جنوب میں واقع جلُود میں التباسی خاندان کے دو گھروں پر دھاوا بول کر انہیں آگ لگا دی۔ یہ واقعہ خاندان کی تقریباً دو ماہ کی بے دخلی کے بعد اسرائیلی عدالت کے حکم پر اپنے گھروں کو واپس پہنچنے کے چند گھنٹوں بعد پیش آیا۔ آگ لگنے سے دونوں گھروں کو شدید نقصان پہنچا۔مقامی افراد نے آبادکاروں کو روکنے کی کوشش کی، تاہم بڑی تعداد میں اسرائیلی فوجی علاقے میں پہنچ گئے۔ فوج نے حملہ روکنے کے بجائے آبادکاروں کو تحفظ فراہم کیا۔
دوسری جانب نابلس کے جنوب میں واقع قریوت میں آبادکاروں نے ایک فلسطینی خاتون کے گھر میں گھس کر اسے تشدد کا نشانہ بنایا۔ گاؤں المغیر میں رات گئے صیہونی آبادکاروں نے ایک فلسطینی خاندان کے گھر پر حملہ کردیا۔ حملہ آوروں نے گھر کی کھڑکی سے پیٹرول بم اندر پھینکا، اس وقت خاندان کے افراد گھر میں موجود تھے۔
