پوری قوت سے غاصب صیہونی حکومت کا مقابلہ کریں گے، جہاد اسلامی

مقبوضہ بیت المقدس: جہاد اسلامی کے رہنما انور ابوطہ نے کہا کہ فلسطینی قوم کے خلاف صیہونی جرائم کا تسلسل ایک حقیقی جنگ ہے جسے فلسطینی پوری طاقت سے لڑیں گے۔ شعبہ اطلاعات کے سربراہ نے کہا کہ دشمن کو جان لینا چاہیے کہ اسلامی جہاد موؤمنٹ کے لیے سب سے قیمتی چیز فلسطینی عوام کا خون ہے اور یہ کہ صیہونی حکومت کی نابودی تک مزاحمت کی گولیاں صیہونی فوجیوں پر برسائی جاتی رہیں گی۔
اسلامی جہاد کے عہدیدار نے کہا کہ فلسطینی قوم کا انتفاضہ مختلف شکلوں میں جاری رہے گا اور کوئی بھی سیکیورٹی معاہدہ اس میں خلل پیدا نہیں کرسکتا۔ انہوں نے کہا کہ امریکہ اور یورپی یونین کو یہ بھی جان لینا چاہیے کہ صیہونی حکومت کا مقابلہ کرنے کا فیصلہ بدستور قائم و دائم ہے اور ہماری قوم اچھی طرح جانتی ہے کہ تل ابیب کے حامی ملکوں کے تمام سیکیورٹی اقدامات اور سیاسی موقف اس غاصب حکومت پر مجاہدین کے حملوں کے مقابلے میں اسے حمایت فراہم کرنے کے لیے ہیں۔ مجاہدین کے حملے صیہونی حکومت اور اس کے اتحادیوں کے ستونوں کو ہلا کر رکھ دیں گے۔ جہاد اسلامی فلسطین کے رہنما ابوطہ نے ریاض تہران معاہدے کے بارے میں کہا کہ ہم ایسے کسی بھی اتحاد اور معاہدے کا خیرمقدم کرتے ہیں جس سے امت اسلامیہ کے اتحاد کو تقویت ملے اور دشمنوں کے خلاف اس کی طاقت میں اضافہ ہو۔