Raza Musani 
راولپنڈی: خیبر پختونخوا کے ضلع شمالی وزیرستان اور بنوں میں سیکیورٹی فورسز کے آپریشن میں 7 دہشت گرد ہلاک ہوگئے۔ آئی ایس پی آر نے بتایا ہے کہ سیکیورٹی فورسز نے دہشت گردوں کی موجودگی کی خفیہ اطلاع پر شمالی وزیرستان کے علاقے حسن خیل اور بنوں جانی خیل میں آپریشن کیا، سیکیورٹی فورسز کے دو مختلف آپریشنز میں فائرنگ کے تبادلے کے دوران 7 دہشت گرد مارے گئے۔جانی خیل بنوں میں آپریشن کے دوران 5 دہشت گرد مارے گئے ہیں جبکہ شمالی وزیرستان کے علاقے حسن خیل میں آپریشن کے دوران ہلاک ہونے والے دہشت گردوں کی تعداد دو ہے۔ آپریشن کے دوران دہشت گردوں کے قبضے سے کثیر تعداد میں گولیاں اور ہتھیار برآمد کیے گئے۔آئی ایس پی آر کے مطابق دہشت گرد سیکیورٹی فورسز پر حملوں اور دہشت گردی کی وارداتوں میں ملوث تھے۔ مقامی عمائدین نے دہشت گردی کے خاتمے کیلئے مکمل تعاون کا عزم ظاہر کیا ہے۔ دو روز قبل شمالی وزیرستان کے علاقے دتہ خیل میں دہشت گردوں نے فوجی چوکی پر حملہ کیا تھا، فائرنگ کے شدید تبادلے میں 28 سالہ سپاہی حامد علی نے جام شہادت نوش کیا تھا۔
