Raza Musani 
کراچی: حامیان مظلومین فلسطین پاکستان کے زیر اہتمام نشترپارک، کراچی میں ہزاروں بچوں نے کفن پہن کر فلسطین سے اظہار یکجہتی و تجدید عہد کیا۔ جلسے میں بلاتفریق مذہب و مسلک اور ہر قسم کی سیاسی و گروہی وابستگی سے بالاتر ہو کر ہزاروں افراد جس میں کثیر تعداد میں خواتین، بچے، بزرگ اور اسکولوں کے طلبہ شامل تھے شریک ہوئے۔
جلسے میں مظلوم فلسطینیوں پر ڈھائے جانے والے مظالم کے عنوان سے ایک بڑی نمائش کا بھی اہتمام کیا گیا تھا جو عوام کی توجہ کا خصوصی مرکز بنی رہی۔ جلسے سے علامہ نصرت بخاری، علامہ صادق رضا تقوی، علامہ امین شہیدی، علامہ ناظر عباس تقوی، علامہ ڈاکٹر عقیل موسیٰ، علامہ حیدر عباس عابدی، علامہ عروج زیدی، حافظ علامہ حیدر عباس نقوی، علامہ جواد نوری، سردار مینگل سنگھ اور دیگر نے خطاب کیا جبکہ نامور منقبت خواں و نعت خواں حضرات نے منظوم نذرانہ عقیدت پیش کیا۔ امامیہ اسکائوٹس اور پیام ولایت اسکائوٹس نے شھداء کو سلامی بھی پیش کی.
جلسے میں شہید فلسطینی بچوں کی قبور اور لاشوں کی منظر کشی بھی کی گئی تھی، جبکہ طلباء نے موجودہ فلسطینی حالات پر ٹیبلوز بھی پیش کئے۔ اس موقع پر فلسطینیوں سے تجدید عہد بھی کیاگیا۔
جلسے سے خطاب میں مقررین نے کہا کہ اب وقت آگیا ہے کہ اقوام عالم امریکا اور اسرائیل کے مظالم کے خلاف سخت اقدامات کریں ورنہ تاریخ انہیں کبھی معاف نہیں کرے گی اسرائیل کی ناجائز ریاست مٹ کر رہے گی اور مظلوم فلسطینیوں کا خون رنگ لائے گا۔
